بحر الشوق – عدنان بنيس / قصيدة زجلية

لو كان الشوق حمامة

نتباها بها تاج فوق راسي عمامة

بياض لونها يهني بالي ويزيد سلامة

تهدى روحي بحلاوتها وصوتها تفاجي الغمامة

وردة نحفرها في وجهي وشامة

أو نعطيها هدية ليد البنية تحني غرامة

أو في ليلة قمرية نسعد بها منامة

أو نسميها عروسة قلبي مريامة

يا حصرة على الشوق، يخلي العاشق في دوامة

*******************

لو كان الشوق طْبيب

يمكن عندو لقى صَدر رْحيب

نتمناه يداوي، تّفاجى هوالي ما نْخيب

نحكيلو قصتي مع الحب السّْليب

أبطالها لِهم صبر عْجيب

ليها عنوان بيه نغني لهجران الحْبيب

ليها زمان الماضي بلا مستقبل قْريب

ليها نار حامية جمرة في القلب طّيب

ليها نغمة حزينة في المجمع شَجن طْريب

ليها كلام رموزو لقلوب العشاق تْصيب

يا حصرة على الشوق، بردو قارس وشتاه صْعيب

*******************

لو كان الشوق هْلال

نسعد بوناستو، ونكون في ضيافتو سُوال

ليه بسمة ما احلاها، نسهر معاها الليالي قْيال

ليه بهجة ما احلاها، نظل لمعادها عْوال

يا هلالي يا هلالي

ليك أنتا، وحدك أنتا

نبوح لك بحكاية الغْزال

نجعلك أنتا، وحدك أنتا

بيني وبين خليلي مْرسال

ذاك الغْزال، ذاك الغْزال

هجرتو وبقى حبو يعمر البْال

أش ذنبي ينا، يبقى خاطري من حال لْحال

أش ذنبي ينا، واش ندير أنا

إلا يوم حبيت نروح لحبيبي جُوال

لازم نقطع بلدان وبحور وجْبال

يا حصرة على الشوق، نارو تكدي كل عاشق للمحنّة عْطال

الصورة لياسين أبو يعلى


http://arabic.moroccoworldnews.com/?p=28887